Ka Jaitbynriew Ka Bym Thikna Ïa La Ka Jong Ka Kyrteng

Ki don bun tylli ki shnong, ki jaka bad kumjuh ruh ki jylla bapher bapher jong ka Ri India kiba la pynkylla ïa ki kyrteng sin jong ki sha ki kyrteng trai ri trai muluk kumba la jer la thoh da ki kñi ki pakulong naduh hyndai kulong kumah. Ha ka jaitbynriew jong ngi ruh, ka la ju don teng kaba kum kane ka pyrkhat, na ka por sha ka por la ju ïohsngew ïa ka jingïalap khana khadeh hapoh ba shongkai shongïaid shaphang ka jingpynkylla ïa ka kyrteng Meghalaya; ba bun balang ki pynpaw ïa ka jingsngew khohñioh ïa kane ka kyrteng naba ka dei ka kyrteng bala shu ai ñiewbeiñ da u khyllah jait u wan wir u poi hap. Bunsien pat kiba kum kine ki jingïakren ki shu kut noh tang ha lyer khlem lah ban pynurlong namar ba ka dei kaei kaei lehse kaba wat ki khraw pyrkhat, ki nongïalam ki shem jingeh bad kim shlan ban shim ka jingkitkhlieh ban pynlong ïaka kum ka mat jingdawa; ka dei ruh ka mat jingdawa kaba khampher kaba wat ki ‘riew shim kabu saiñ hima sima ruh kim ju nud ban pyndonkam bakla ïa u sabieng bad ban kren laplah. Kam da dei eh na ka daw ba ka long ka jylla khleh khawlang bad u Garo, lada u Garo u nud ban dawa la ka jong ka jylla kaba u ai kyrteng ïaka kum ka Garoland, balei pat ki jong ngi ki shong kynjah jliam jliam? Ka daw baroh hi ka dei namar ba ka jaitbynriew jong ngi ka dei ka jaitbynriew ka bym thikna wat ïa ka kyrteng la jong. Hashuwa ba kan dawa la ka jong ka jylla, khlempep ka la dei ban don lypa ïa ka kyrteng jong kata ka jylla kaba ki mut bad thmu ban dawa. Hynrei kum ka jaitbynriew pat kam shym don satia ïa kata ka kyrteng kaba la ïamonlang bad ïasoi ïasaiñlang da baroh u paid nongshongshnong jong ka jylla; kum ki nongshongshnong don kiba khot bad kam ïalade da ka kyrteng Khasi bad kine ki sngewdei ban ai kyrteng ïaka jylla kum ka Khasiland nalor nangta, ki don pat kiba pyrshah ïa kane, ki sngewsarong ban khot bad ban kam ïalade da ka kyrteng Hynñiewtrep bad ïaka jylla kum ka Bri u Hynñiewtrep. Hangne keiñ ka mih ka jingkylli: uei u Khasi bad uei u Hynñiewtrep ? Kane ka dei ka jingkylli kaba eh bad ka long ruh kaba shitom ban ïoh ïa ka jubab khamtam na ka jaitbynriew kaba la shu im ha ki syrdoh jong ka dumbuit bad kaba la shu pynshong lyngngeit ïala ka thymmei bad histori jong ka tang hapoh jong u sawar mutdur siat pharshi. Kam long ruh kaba suk ban dang khyllie syrtap pa syrtap ïaka histori jong ka jaitbynriew kaba la btep lyngba jong ki lngaid ki lwait ka por; tang ban ïohbat ïa u saipdeng jong ka ruh, kata, la donkam ban durïap da kaba jyrthiaw tluh jyrthiaw steiñ bad bishar salani shongkun shongshnah ïa ki thnet ki thnaw da kaba suhkhlieh shaduh ki pyian ki kynïan jong kathie ka mynnor.

Uei u Hynñiewtrep?

Ka thymmei jong u Hynñiewtrep ne ka kyrteng Hynñiewtrep hi, ka dei kaba paw nyngkong eh bad la ïoh ruh ïaka na ka khana Kynthong ne Ka khana Pyrkhat jong ka jingkieng ksiar bad u Khathynriew trep Khathynriew skum. Ïa ka rta jong kane ka khana ruh lehse dang lah ban thew lyngba u diengkot jong ka por; katkum ka khana hi ka pyni bad ka ïathuh ba u Hynñiewtrep u dei u kur bad u bynta jong u Khathynriew trep bad u wan sha pyrthei ban rep ban riang lyngba kata ka jingkieng ksiar. Ha ka khana hi, ngi shem ïa ka ktien “rep/ riang” hangne lah ban sngewthuh ba ïa katei ka khana la shna bad thaw dei tad hadien ba u briew u la nang bad tip kumno ban rep ban riang, ka dei ha ka juk bad ka por jong ka agriculture age kaba ki ong haka ktien nongwei. Ka jingkylli mynta pat ka long: mano ba shna bad thaw ïa katei ka khana? Ka khana kam lah ban mih hi dalade khlem u nongthaw ne u nongïathuh ïaka, ka jubab ïa kane ka long, u dei u Khasi u ba shna bad saiñdur ïaka khana lyngba ka saiñ pyrkhat jong u hi. Nangne, lah ban sngewthuh ba u Khasi ne ka jaitbynriew Khasi ka dei kaba la kham rim kham hashuwa shuh shuh ban ïaka khana hi. U Khasi lah ban ong ba u dei u briew bashisha kumba u long, katba u Hynñiewtrep pat u dei tang u tyngshop ha kata ka khana mutdur jong u Khasi.

Uei u Khasi?

Ka long kaba suk bad ki don  bun ruh kiei kiei kiba ngi lah ban pyni sha ka pyrthei shaphang ka jinglong Khasi jong ngi, hynrei ka long pat kaba eh ban ïathuh ïaka jingsdang bad ïaka thymmei ri jong ngi(Khasi). Haduh mynta mynne ngim tip kumno,mynno bad mano ba ai ne jer wat  ïa ka kyrteng Khasi ruh, namar ba ka kyrteng Khasi hi ka dei ruh ka ktien kaba ym lah ban pynwan(translate) wat naka ktien Khasi sha ka ktien Khasi. Kane kam shym mut pat ba ka jubab kam don, hynrei ka shu leit long noh ba ngim tip shuh ïa ka, naba kala duh noh  hapdeng ki rta bah jong ka por. Kane hi ka pyni bad pynshisha ba ka jaitbynriew Khasi ka dei kaba la rim  bad ym lah ruh  ban thew ïaka rta jong ka tang lyngba ka bor kynmaw.

Balei u Khasi u thaw ïaka tei ka khana?

Ka jaitbynriew Khasi kumba la kdew, ka dei kawei napdeng ki jaitbynriew jong ka pyrthei kaba ka rta jong ka ruh kala rim kat ki mawsiang bneng. Hynrei haduh mynta pat ka dang dei pat ka jaitbynriew ka bym thikna ïa la ka histori bad ka bym tip ïa la ka thymmei la jong. Ka daw lehse ka lah ban long ba ka dei ka jaitbynriew ka bym don ïa ki dak thoh, bunsien ka kren bad ïathuh ïa ka mynnor jong ka tang da ka bor kynmaw lyngba ki khana pateng; ka long kaba shitom ban buh beit buh ryntih ïa ki jingjia tang da ka bor kynmaw namar ba ki jingjia ruh ki lah ban kylla katkum ki nongïathuh ïaka bad bunsien ki khana ki shu kut bad jah noh ha ki rta bah jong ka por. Lada ka dei tang 200 snem ruh, hynrei ban thew tang lyngba ka bor kynmaw, khlempep, ka la dei kaba la rim bad ka hyndai bah. Ka dei ka jingbymlap trai shuh ïa la ka thymmei (histiorical anthropology), kaba pyllong ïa u Khasi ban thaw noh da ka ‘myth’. U Khasi u dei lypa u myllung bad bunsien u sngewtynnat ban ai dur ai dar ai rong ai rup ïa ki tyngshop puron ba u mutdur katkum ka sengnia sengpyrkhat jong u bad khnang ba kata ka pyrkhat kan neh slem haka jingmut jingpyrkhat jong ki longdien, kumta, u thoh ïa ka haka mariang, ha ki dieng ki siej,ki lum ki wah,ki syntiew ki skud,ki sim ki doh bad kumta ter ter. Shisha ym lah ban len ba ki puriskam ki purinam ruh ki don haki laka pharshi ba bun jingmut teng teng kiba ym lah peiba ïa ka jingmut ba la bsiap hapoh jong ki, wat ki khanatang ruh ki don ïaka snap jong ka history. Hynrei ka long pat kaba bakla ban bret ïa ka jingshisha bad ban pyllong doh pyllong snam pynban ïa ka khana bad ki tyngshop puron na ka pyrthei rngai jong ka jingmutdur ïa kiba ngi lah ban ïohi ïa ki tang lyngba ki khmat jong ka pyrkhat bad ban tba ïa ki tang lyngba ki kti jong ka jingngeit. Ka jingpdiang ïa ka khana bad ka jingkyntait ïa ka jingmut kaba don hapoh jong ka, ka long kumba pynksan ïaka ramia.

Hynñiewtrep kam mut tang ïa u Khasi

Ka jingpyrkhat ba Hynñiewtrep ka mut bad thew tang ïa u Khasi, kata, ka dei ka pyrkhat kaba ïengnongshun ïa ka pyrkhat u Khasi hi. Kaba kum kane ka pyrkhat ka long kaba sumor ka long pynban kum ka jingpynjah burom bad pynsniew dur ïa ka rynïeng rynïot jong ka pyrkhat pyrdaiñ jong u Khasi. U Khasi um dei u ba lyngkot bad jyndong jingmut haduh katta katta, watla ïalade u im tang hapoh ka jingshai jong u kseh hynrei ka pyrkhat pyrdaiñ jong u pat ka dei kaba la ïaid shaphrang kham shakhmat shuh shuh ban ïa ka por kaba u im. Hynñiewtrep, kumba ka paw ha ka khana kam shym thew ïa ka kynhun jaitbynriew hynrei ïa ka jingwan bad jingsdang jong ka longbriew manbriew ha pyrthei, kum ka nuksa. Lada bishar na ka rukom pyrkhat niam jong u Khasi lah ban sngewthuh shisha haduh katno ka jingïar bad jingjylliew jong ka; kaei ka niam Tipbriew Tipblei katkum ka pyrkhat u Khasi ? Haba ong Ka Niam Tipbriew Tipblei, u Khasi um mut ban ong ba dei tang u Khasi ne ka jaitbynriew jong u kaba lah ban im ka jingim ba tipbriew Tipblei, hynrei uwei uwei u jaitbynriew ruh u lah ban im lem kumta bad haba ki lah ban im kumta, kata, ki la dei lypa ki bynta ne ki dkhot jong kane ka niam. Ka niam Tipbriew Tipblei ka donkam bad ka dawa tang ïa ki kam jong u briew ym ïaka jaitbynriew ban long dkhot ha ka.Ym don ka jingpynrung ne ka pynmih dkhot ha ka, uno uno u lah ban rung bad ban mih katba u mon, ka shong katkum ki kam bad rukom im jong u briew. Ka dei ruh ka niam ka bym lah ban longtrai ne kam trai da kano kano ka kynhun jaitbynriew namarkata,ka niam tipbriew tipblei ka dei ka niam jong baroh kawei ka longbriew manbriew ha shisnieh pyrthei. Kat nang ïaid ki por, ïa kane ka pyrkhat u Khasi la nangpynjngut la nangpynsniewdur bad pynsañiangmat da ki leh batip kham hadien lyngba ka jingseng jong ki ïa ki niam Thawnang Thaw bynriew, watla u Khasi hashuwa u la dep mana lypa ba dei ban kiar raimaw raidieng na ka Thawnang ïoh wan ka lait kylla. Ki niam kur ki niam hima ki dei tang ki niam thawnang thawbynriew kiba la nang pynbakla ïa ka pyrkhat tynrai u Khasi; ka jingbakla kaba kham khraw shuh shuh ka long hadien ba ïa kane ka pyrkhat la nangpynjyndong bad pynkhun ranap tang sha kawei ka kynhun jaitbynriew bad pyllong ïa kata ka kynhun ba kan kam trai syndon ïa ka. Ka dei kane keiñ kajuh ka pyrkhat khwan kaba pyllong ïa kane ka jaitbynriew jong ngi mynta ban pyrkhat ba Hynñiewtrep ka dei tang ïa u Khasi da kaba kyntait sharud ïa kiwei kiwei ki jaitbynriew jong ka pyrthei.

U Khasi u la dep tip bad u la ïa kynduh ïa kiba bun bah ki kynhun bad kolshor jong ki jaitbynriew bapher bapher jong ka pyrthei lyngba ka jingïaid wir jong u hashuwa ba un poi ha kine ki lum, lym kumta, kumno un tip bad ïoh ïaka kyrteng jong ki lum makashang bad ka sohmyndur, kumno u briew u ba im haka jaka ba don tang ka umjer bad u thah un tip bad ïoh kyrteng ïa ka ïor? Lada ïaka myth yn shim kum ka histori, kumba don bun kiba ngeit ba u lum sohpetbneng, ka diengïei kiba don shisha katkum ka khana, kumno pat ha kaba ïadei bad ka jingkieng ksiar, khlempep, ka la dei ban don hangno re hangno ha ki bynta jong ka pyrthei. Ka jingkylli pat ka long, hato kata ka bynta ka dang dei ne em ka bri u Hynñiewtrep ? Shuh shuh haba u ong,”shikhrum ka bneng bad shisnieh pyrthei” hato kane kam mut ba u Khasi u kren kyllum ïa ka longbriew manbriew baroh kawei? Ka ktien Hynñiewtrep ha ka khana, ka dei bad ka thew ïaka longbriew manbriew, katba Khun u Hynñiewtrep pat ka thew ïa ka kynhun jaitbynriew namarkata, U Hynñiewtrep bad u Khun u Hynñiewtrep watla ki syriem haka rukom kynnoh hynrei ka jingmut jong ki pat ka ïapher kawei na kawei pat.

Kumno ka ktien Hynñiewtrep ka kylla longdoh longsnam?

Ka kyntien bad jingmut Hynñiewtrep katkum ka rukom pyndonkam ïa ka mynta, lah ban ong ba ka dang dei kaba dang thymmai bad dang shen eh, la kumno kumno dang ha ki snem 1980’s. Hashuwa jong kata, ïa ka tei ka ktien bad ïa ka rukom pyndonkam ïa ka, lah ban ong ba ka dang long beit ha kata ka dur kumba ka long tang ha ka khana hi. Ym pat ju ïohsngew bad ym pat ju kynmaw shisien ruh ba ki meiieid paieid, meirad parad ha ki jingïathuh khana jong ki ba kin pyndonkam ban ong; “u Hynñiewtrep mynhyndai te me u ba kumta kumta…”, hynrei borabor ki pyndonkam ban ong, “U Khasi mynhyndai te me u leh kumta u kam kumta…”. Shuh shuh lada pyrshang ban weng ne buh bujli noh da ka ktien Hynñiewtrep ha ka jaka jong ka ktien Khasi, khlempep kan don ka jingsngew dkoh sngew anna ym tang ha u nongkren, hynrei wat ha ki shkor jong u ba sngap ruh kumjuh, katto katne lah ban ïanujor kum ki nuksa, (a) Shad Khasi bad Shad Hynñiewtrep; (b) Akor Khasi bad Akor Hynñiewtrep; (c)Niam Khasi bad Niam Hynñiewtrep (d) Syiem Khasi bad Syiem Hynñiewtrep; bad kumta ter ter. Ban pynsngew ïa kum kitei ki ktien “Hynñiewtrep” ha ki ‘riewtymmen, khlempep, wat ma ki ruh kin ym sngewthuh, lah ban shah tim pynban, kin ong ba ka dei ka kren thawnang kren laplah, kren khyllah da u/ka khynnah ba dang mynhynnin. Kane hi ka pynshisha ba ka dang dei kaei kaei kaba thymmai eh kaba shitom ban pdiang ne wat ban pynngeit ïalade ha kaba kum kata namar ba ka dei ruh kaei kaei ka bym pat ju don ne pyndonkam ïaka ha ki juk bad ki por mynshuwa.

Ym lah ban len ba dei u myllung Soso Tham u ba la pynphriang bad nang pynpaw nam shuh shuh ïa kane ka ktien “Hynñiewtrep” lyngba ka kot “Ki sngi barim u Hynñiewtrep”. U Soso Tham haba u buh ïa ka ktien sngi barim u Hynñiewtrep, u mut bad u da thmu kyrpang ban kdew ïa ka por. Da lade u ong ba u por u dei u nongshynshar pyrthei, kaba mut ka por ka dei kaei kaei kaba long solansar ha shityllup ka pyrthei, ym tang u Khasi u ba im bad mad ïa ka sotti juk ne kata ka aïom ksiar, hynrei baroh u khun bynriew (Hynñiewtrep)ha shi snieh ka pyrthei u ïoh lem ïa ka. Na ka thymmei longbriew manbriew la mih ki kynhun jaitbynriew bapher bapher  ïa kiba la kha napoh ka syngkai jong ka por.

Ka kot “Ki sngi barim u Hynñiewtrep” ka don ha ka ïa u synñiang bakhraw eh na ka bynta ka jaitbynriew. Ka jingpynrung ïa ka ha ki kyrdan jingpule ka la ïarap shuh shuh bad ktik ïa ki jingmut jingpyrkhat jong ki samla pule namar ba hapoh jong ka la dep ban bsut lypa ïa u saihon jong ka mynsiem ieid ri ieid jaitbynriew.kata,ka long hadien bala seng ïaka Khasi student’ union ha u snem 1978, Ki bun bah ki kyntien phira kiba la sot na Kane ka kot ïa kiba la pyndonkam ruh ïaki kum ki slogan ha kiba bun bah ki jingïakhih(agitation) jong ka seng.Kane ka seng ki samla pule(ksu) kala ïaleh doh im dohïap ban pynïatylli ïaka jaitbynriew ha ka kyrteng “Khasi” lyngba ka jingpynkha unit jong ka ha ki bynta ri lum mihngi(jaiñtia)watla ka don ka jingsngew khohñioh na ka seng jong ki samla pule jong kato ka thaiñ bala tip kum ka Jaiñtia student union(JSU) .. Ka KSU ha kato ka por,ka dang shim kyllum beit ba u khynriam,u pnar,u bhoi,u war ki dang dei hi hapoh ka jylli jong u paid Khasi baïar..

Lehse,lah ban ong ba dei ka ka seng Hynñiewtrep Achik liberation council(HALC) kaba la nang pynshlur bad ai thynram shuh shuh ïa ki sengbhalang bapher bapher kiba kham hadien ba kin pur kin snoh ha Kane ka pyrkhat Hynñiewtrep.Ka HALC bad ki nongïalam jong ka, ki bym shym la ïohi jngai hynrei kiba la shu ïohi rngai ïa ka jingbym lah jong ki ban pynïatylli ïaka jaitbynriew lyngba ka kyrteng Khasi,kumta,ki pynlong langkñia ïakane ka kyrteng ‘Khasi’dakaba ïapeiñ ïaka bad ka kyrteng ‘Hynñiewtrep’,Kane baroh ka kylla long pynban tang kumno  ban ïoh pynsngewbha ïa u Pnar u ba ju khohñioh ban kam ïalade ba u dei u Khasi. Kala don ruh ka jingpyrshang jong kane ka seng ban pynïatylli ïa ka jaitbynriew ha kawei ka kyrteng da ka jingai jingmut ba dei ban pyndam noh ïa ki kyrteng jong ki kynhun bapher bapher kiba don bad pynïasnoh ïaka kyntien “KHASI & JAIÑTIA” hynrei Kane ka jingpyrshang jong ka kam shym la urlong bad wat na ka liang jong ki kynhun balang ruh Kim pdiang ïa katei ka jingai jingmut jong ka.

Ym lah ruh ban len ba dei kane ka seng pyrkhat jong ka HALC bala pynkylla kyrteng pat ïa ka hadien sha ka HNLC; kaba la ai mynsiem bad pynktik ïa ki jingmut jingpyrkhat jong ki samla khamtam kito kiba dang khie dang san ba kin pdiang ïa ka pyrkhat jong ka lyngba ka ktien “Hynñiewtrep”.  Suki suki,kane ka pyrkhat ka ïoh ban suhthied bad sei ïa ki shylluit ha ki jympuiñ pyrkhat jong ki samla kiba ju shim ïalade kum ki ‘riew ieid ri, katba u ba bun balang u ‘riewpaitbah pat, u dang ïai pyndonkam beit da ka kyntien “Khasi khara”. Ka jingpyrshang ban weng ïa ka ktien “Khasi” bad ban shim ïa ka ba ka long tang ka kyrteng jong ka thaiñ bad ban bujli pat ïa ka da ka ktien “Hynñiewtrep” kum ka kyrteng jong ka jaitbynriew, kan dei ka thawnang bad kan long ruh ka jingbakla bakhrawtam namar ka long pynban kumba pynduh pyndam syndon ïa ka histori jong ka jaitbynriew hi baroh kawei. Kane ka pyni ba baroh ki nongthoh kot, ki historian kiba la im haki juk bad ki rta bapher bapher ki la bakla lut naba ki la pyndondonkam ïa ka kyntien “Khasi” ha ki jingthoh jong ki kum ka kyrteng jong ka jaitbynriew. Lada ka ïai long ha kane ka rukom, ym slem ba ka pateng jong ki longdien kan sa ïoh ban pule ïa ka histori bathymmai bala thoh daki briew jong kane ka juk mynta, lehse, ki bym lah ban tip ne ïohi palat lait nala ki mei ieid paieid la jong. Kane kan dei ka histori kaba la buh bad thung ïa ki maw nongrim jong ka tang ha ka khana pharshi. Ka kyntien “Hynñiewtrep” kumba ka long ha kine ki sngi kala kylla long pynban tang kum ka shap jong ka jingieid ri, katba ka kyntien “Khasi” pat ka kham ïar namar ba lyngba jong ka lah ban ïohi teng ïa ka niam, ka riti dustur bad ka kolshol, ka jaitbynriew hi baroh kawei. Kane baroh ka long ba ka kyntien “Khasi” ka dei kaei kaei kaba la rim bad kaba la longdoh longsnam ryngkat ryngkat bad ka jaitbynriew.

Kum ka jaitbynriew kaba la shu jngi hapoh ki thwei dum jong ka lyngngoh lyngngaiñ, ka bym tip shuh ban pynïapher ïa kine ki artylli ki rukom pyrkhat, kumta, hangno keiñ kan lah ban pynthikna ïa la ka kyrteng la jong. Kawei ka pyrkhat ka ïeng ban pynneh pynsah bad pynïatylli ïa ka jaitbynriew lyngba ka kyrteng “Khasi”, katba, kawei pat markhongpong, ka ïeng ban ïaleh pyrshah ban ïoh pynlaitluid ïaka jaitbynriew na ka jinglong Khasi jong ka. Lada Hynñiewtrep ka dei ka kyrteng bala ai naka bynta ka longbriew manbriew baroh kawei, kata, kito ki seng ne kynhun kiba ai kyrteng Hynñiewtrep ïalade, kin dei ki seng kiba trei mon sngewbha na ka bynta ka bha ka miat jong ka longbriew manbriew baroh kawei, hynrei lada ki dei pat ki seng kiba trei bad thmu kyrpang tang na ka bynta jong kawei ka kynhun ne jaitbynriew, kata, ka la don lypa ka jingphalang haka rukom pyrkhat kaba lah ban kyrtoh kylla pynban sha lade.

-Bah Shemphang Phanbuh

Tags: , , ,

One Comments

Leave a Reply