SOHRA TAP THLONG

Ki don da ki spah bad hajar tylli ki kyrteng jong ki shnong bad ki jaka bapher bapher ha kylleng jong ka Ri Khasi; hynrei lada pyrshang pat ban ïanujor ïa ki kyrteng jong ki, ngin shem ba bun hi na ki, ki dei kito kiba don ïa kajuh ka kyrteng sdang kum Maw, Wah, Soh, kiba kham long kyllum eh. Lada shu bishar antad lah ban ong ba u Khasi hyndai u dei u ba kham jaituh ha ka jer ka thoh kyrteng, lah ruh ban ong ba hynñiewphew naka shispah kiba don ha ki sawdong sawkun jong u kum ki ñiut ki ñier, ki dieng, ki syntiew ki skud, ki khñiang ki ksiah ki dei ki bym don ne sah kumto khlem kyrteng; hynrei ïakiba la shu khot kyllum ïa ki kum ki jhur khlaw, ki ‘tiew khlaw, ki diengmet bad kumta ter ter. Haba bishar pat ha kawei ka liang, lah ban ong ba u ‘riewhyndai u dei u ba stad bad pnah haduh katta katta ha kaba ai dur ai dar, ai rong ai rup bad oh shrong oh shrup ïa ki kyrteng sin ktien rngop bad i kumba u da jied janai thik pa thik ï aki hashuwa ba un pyndonkam ïaki. Ki don ki shnong watla ki la dep don lypa ïa ka kyrteng jong ki, hynrei dang don bad pynbud pat sa ka kyrteng sin kum ka jingñiewbeiñ bad ñiewpoh ïa ki. Katto katne kum ka nuksa, nalor ka kyrteng Mawkisyiem dang pynbud pat sa ka kyrteng Mawkisyiem kup byrni; Mawmluh kum u Mawmluh klet ïa, u Mawsmai tuh tasam, u Shella tuh nep bad kumta ter ter. Ha kaba ïa dei bad ka Thaiñ ruh kumjuh,u ta u Maram sap ‘jat, u War bong khyllieng, u Nongwei phan pyut, u Synteng jngi lyoh bad kiwei kiwei. Kumjuh ruh ha kaba ïadei bad ka kur ka jait la ju don ka jing sin, kum u Diengdoh pnah thylliej, u Swer pynshad khiewja, u Sohkhlet pyrdet, wat haduh ka kyrteng jong u briew ne ka briew shimet ruh kumjuh, u Khasi um ju don tang kawei ka kyrteng hynrei nalor ka kyrteng kaba la jer la thoh ruh dang don bun tylli sa ki kyrteng khot ieid ki kyrteng sin kyrteng rngop lai phewjait. Khatduh ngin shem ba wat ka Ri bad jaitbynriew ruh haduh mynta kam don ïa ka kyrteng ba thikna jong ka, kiwei ki khot Ri Khasi katba kiwei pat ki khot da ka kyrteng Hynñiewtrep..

 

Kane ka dei ka jinglong jong ka jaitbynriew jong ngi, watla ka long ka jaitbynriew kaba tang shitroh pynban hapoh jong ka la don lypa u kruiñ bam ngem, namarkata, naduh kut shaduh shabar la ïohi ïaka dak orpait kaba la ai ksai lypa bad pynsuk ïaka ban nongpharia ïa ka kumba thlieh lakhar sawmat.

 

Ha kaba ïa dei pat bad ka kyntien “Sohra Tap Thlong” kaba long kawei na ki kyrteng sin kaba la ïalam bakla ïa u ba bun balang hakaba ïa dei bad ka jingmut kaba don ha lyndet jong ka, bunsien haba ki briew tang shu ïohsngew ïa katei ka ktien kala pynlong la ka pynlong ïa ki ba kin bishar bad peit da ka mat kynriang ym shuh daka matïong namar ba ki shim beit ba kane ka ktien ka dei kaei kaei kaba ïa snoh beit bad ka jingshet kylla (betrayal), katba ha ka jingshisha pat ka ktien “Tap thlong” bad ka ktien “Shet kylla” ki dei ki artylli ki ktien kiba ïapher bak-ly-bak haka jingmut jong ki te, khnang ba u babun balang un ym sah haka umdum, kumta la dei ban ïalaw ïaloit ïaki suhsat jong ka lyngngoh lyngngaiñ kaba la ju ïalam bad pynsngewthuh bakla baroh shikatta. Ka ktien Sohra Tap Thlong ka dei ka ktien bala ju pyndonkam hakaba ban sin ban rngop bad kane ka kyrteng sin ka mih dei tad hadien jong kawei ka jingjia kaba la tip kum ka Nongkhlaw Massacre. Ka dei ka jingjia hakaba ki shipai jong u Tirot Sing Syiem jong ka hima Nongkhlaw kila hiarthma kyrthep (ambush) ïaki shipai jong ka East India Company, ha kane ka jingjia katto katne ki shipai bad ki officer phareng kila ïap laitnoh u David Scott u bala lait daka said naka jingïap hadien bala pynrieh noh ïa u da u Duwan Sing Syiem jong ka Hima Sohra na kti ki shipai Nongkhlaw kiba la beh bad kthong ïa u ha shi lnger lynti. Ïa u David Scott la ai jaka rieh da u Syiem Sohra ha trai jong ka riat Rangpongpa, ka riat kaba ïeng mar pyrshah bad ka riat Mawïew (Maw Lai Khlieh).

 

Ka kyntien Tap Thlong kam da dei eh tang ka kyrteng sin hynrei ka dei ruh ka ktien phawer ba la pyndonkam ruh ïaka kum ka ktien pharshi halor katei ka jingjia. Ka dei ruh ba ha kato ka por, ïa U Thlong la ju pyndonkam paidbah haka imlang sahlang jong u Khasi ym tang ha kaba dung khaw pujer. Hynrei la ju pyndonkam ruh ïa u ha ka ban tap ïaki khun syiar kiba la ïap khlam noh ka kmie. Da kaba leh kumtei, ka long kumba ïada bad sumar ïa ki khun syiar na u ksar ne uno uno u kynja mrad u ba thmu ban bam doh ïaki, ym tang kata hynrei haba tap da U Thlong ki khun syiar hapoh ki bym don shuh ka kmie ban kdup ïaki, ki ïoh jingsyaid. Hangne lada bishar bha, ngin shem ba u thlong u ïeng ruh kum u nongri nongsumar bad nongïada ïa kito ki lanot kiba don ha syrngiew jong ka jingïap. Hynrei ban ong ban tap ne buhrieh ïa u briew hapoh U Thlong, te ka long kaei kaei ka bymlah ban pdiang. Ha ka pyrthei u Khasi yn ym don U Thlong u ba heh haduh katta katta kat haduh ban da lah ban tap ïa u briew khamtam ïa u Sahep u ba la kumno kumno ka rynïeng jong u kaba hynriew phut tam ne duna.

 

Ha kaba ïa dei pat bad ka ktien “shet kylla” ka jingkylli ka long, “Hato lah mo ban don ka jingshet kylla haba ym shym don lypa kano kano ka jingïakut hapdeng ki arliang mamla?” Ka jingmut jong ka ktien shet kylla ka wan hadien ba ka don ka jingpynkheiñ pynkdiah daka wei ka mamla ïaka juban hadien bala dep ban ïakut bad ïasoi ïasaiñ hapdeng jong ki. Hynrei kano kano ka bymdon lypa kum katei ka jingïateh ïakut, ïa kaba kum kata ym lah ban ong ba ka dei ka jingshet kylla. Ka jingpynrieh bad ai jaka jong u Duwan Sing Syiem Sohra ïa u David Scott kam dei ka jingshet kylla jong u ïa u Tirot Sing bad ïaka Hima Nongkhlaw, namar ba hapdeng jong kine ki hima kam shym don kano kano ka jingïakut. Hangne ka mih ka jingkylli; Balei u Duwan Sing u pynrieh ïa u David Scott na ki shipai u Tirot Sing? Ka Hima Sohra ha kato ka por, ka dang dei ka Hima kaba dang lung bad dang dep seng thymmai ïaka la kumno kumno ha jan bakut ne ba sdang artad jong ka snem 1700s, katba ka Hima Nongkhlaw pat dei ka Hima kaba khlaiñ bad kaba la kham rim haka rta jong ka,la seng ïaka ha ki snem 1524, kata katkum u Dr Homiwell Lyngdoh.

 

Ka Hima Nongkhlaw bad ki Syiem jong ka kila hiar thma la bunsien ïaka Hima Sohra ha ki por bad rta bapher bapher haka por ka jingshynshar u Syiem Buhsing, Buhsing II bad haka por jong u Duwan Sing. Kane ka jingshah hiar thma ba khah khah kala pynmong haduh katta katta ïaka Hima Sohra tad haduh ba kan shim ïaka Hima Nongkhlaw kum ka nongshun ba khrawtam jong ka, namarkata, kam lah ban shaniah bad kane kala buh ïaka haka jingbymsngewshngaiñ namar kam lah ban tip lypa ba ka Hima Nongkhlaw ka lah ban hiar thma ïaka ha kano kano ka por. Ka dei kane kawei kaba pyllong ïa u Duwan Sing Syiem ba un thaw lad bad ban pyrkhat jngai ha kaba ïadei bad lawei ki khun ki hajar bad ka Hima jong u. Ka dei ruh kawei naki dawbah kaba pyllong ïa u ban ïa tehlok bad u nongshun (East India Company) tang namar ban ïoh jingïada na u nongshun jong u hi (Hima Nongkhlaw), kumba ong ka ancient proverb nongwei “The enemy of my enemy is my friend”. Shuh shuh,ka lah ruh ban long ba u Duwan Sing u la ïohi jngai ba yn ym lah ban ïaleh pyrshah da ka thma jong ka wait ka stieh pyrshah ïa u nongshun u ba khlaiñ bor u bala jop kylleng ka pyrthei. Kumta, u hap ban pyntreikam daki buit (diplomacy) namar u la ïohi lypa ïa ki jingmyntoi bad ki jingduh jingmyntoi na kaba u ïateh lok bad la u nongshun.

 

Na ka por sha ka por, la ju ïohsngew ïaka jingud jingnam ba ka jaitbynriew Khasi ka dei ka bym ju ïatylli, teng teng don ruh ka jingkren tang dep bad kren kutlad ba lada u Khasi u ïatylli ka pyrthei kala wai. Hynrei lada bishar lyngba u sawar mutdur jong ki dak ki shin kiba paw pat lah ban ong ba u Khasi um pat ju ïa tylli mynno mynno ruh kumba u long ha kane ka por bad ka dur kaba mynta; namar ba dei artad ha kane ka juk ba mynta ba u Khasi u kren ïaka kam ïap kam im jong ka jaitbynriew da kaba klet ïa ki jingsngew ïapher hima. Ka dei ka jingshisha ba u phareng u la pharia ïaka jaitbynriew Khasi, hynrei lada bishar na kawei pat ka liang ngin ïohi ba dei pynban u phareng u bala wanrah bad ïarap lem ban tehsong ïaka jinglong kawei kum ka jaitbynriew (Khasi nationalism).

 

Ka long kaba sngewlyngngoh bad sngew thamula lada kren shaphang ka jingïatylli u Khasi haki por mynshuwa, ha ka Ri bad ka jaitbynriew kaba rit kaba tang shitroh, hynrei hapoh jong ka pat ki don daki phew phew tylli ki Hima ïakaba la tip ruh ïaka kum kata ka Ri ki Laiphew Syiem. Nangne lah ban sngewthuh lypa ba ka dei ka jaitbynriew kaba la ïapait bad kaba la dep pharia lypa dalade ïalade, ym dei eh na kino kino ki daw kiba wan nabar namar ba ki bor ba nabar lei lah ban ong ba ki long ki nongïarap kiba la hikai lem ïa u Khasi ba un ïatylli. Ha kito ki por, uno uno um da khuslai ne pynleit jingmut than shaphang ka jaitbynriew pynban u kham sngewtynnat bad sngewsarong ban ïoh pynithuh ïalade hakhmat ka pyrthei da ka kyrteng kum u khun u hajar jong ka hima. Kane baroh ka long ba ha kito ki por, ka jingïatylli haka kyrteng jong ka doh ka snam ne  jaitbynriew kam pat don satia, lada kaba kum katei ka jinglong bad rukom pyrkhat ka dang ïai im ïai neh, kumba long mynta, nga tharai ban leit na kawei ka hima sha kawei pat la long kumba leit na kawei ka Ri sha kawei pat kaba la donkam passport ne ILP.

 

Ki Hima Khasi kim dei ruh ki hima kiba shongsuk shongsaiñ, hynrei paramaki ki ïaleh thma kir shi kir bad kawei ka hima ka ïengnongshun ïa kawei pat, ka jingïaphon ka jingïapah ka long markylliang, kata naduh na ïing haduh habar, shuh shuh, lyngba ki dak ki shin kiba paw lah ban ong ba ka jaitbynriew jong ngi ka dang dei ka jaitbynriew ka bympat lah ban bat ïa u lakam bad ban synshar hi dalade ïalade, namar ba ka dei ruh ka jaitbynriew ka bym ju lah ban pynryntih ïaka. Namarkata, ka dang donkam lem ïano ïano ban ïarap pynïaid bad synshar lem ïaka naka bynta ka jingbit jingbiang hi jong ka; kumba long hi mynta, ka jaitbynriew ka ïatylli tang namarba ba ka don ïa u juh u nongshun (common enemy). Hynrei lada kam don nongshun, kata kan ïa ïeng bad long nongshun hi paradoh parasnam.

 

U Tirot Sing um shym la ïeng ban ïaleh na ka bynta jong kiwei kiwei ki Hima Khasi, klet noh ïaka jaitbynriew namar ba ka pyrkhat kum ka jaitbynriew kam pat don ha kato ka por, hynrei u ïeng ban ïaleh tang naka bynta kawei ka dawbah bad kata ka long tang naka bynta jong ka Hima Nongkhlaw bad ïaki khun ki hajar jong ka. Kumjuh ruh kumba long lem, u Duwan Sing Syiem um shem la pyrkhat lem na ka bynta jong kiwei kiwei, hynrei tang kumno ban bit ban biang ki khun ki hajar ka Hima jong u. Hynrei dei tad ynda hadien ba ka mynsiem jingsngew pher hima kala sdang duh hi suki suki, hangta sa sdang ban mih bad bujli thymmai pat ïaka daka mynsiem jinglong kawei haka kyrteng jong ka jaitbynriew (nationalism) bad suki suki ka jaitbynriew ka sdang pat ban pdiang bad ithuh ïakito ki ‘riewïaleh laitluid kiba la ïaleh na ka bynta ki hima jong ki hi pyrshah ïaka jingsynshar nongwei kum kita ki khlawait (freedom fighter) jong ka. Watla katta ruh ka jaitbynriew kala leh klet ïaki katto katne ki riewshlur (unsung hero) kiba la ïap bad aiti ïala ka jong ka jingim haka jingïaleh laitluid, namarkata, ka history jong u Khasi mynta ka sdang bad ka kut tang ha u Tirot Sing bad Kiang Nangbah.

 

Kyntang waiwot, ngin shem ba na kine ki artylli ki hima kiba ju ïashun thlong mluh thlong sying la mih ki arngut ki nongsynshar kiba khraw haka rynïeng rynïot ha la u jong u jong u diengkot. Lada ïa u Tirot Sing la pdiang bad ithuh kum u Syiem ba shlur jong ka jaitbynriew ym tang jong ka hima Nongkhlaw. Kumta, u Duwan Sing ruh un dei sa uwei pat u ‘riewkhraw jong ka jaitbynriew u ba ka jaitbynriew kam ju sammut ne kynmaw ei ei shaphang jong u, watla u long u nongsynshar u ba stad bad shemphang ha kaba ïadei bad ka jinglah jong u ban pynïadei khamtam haka kam synshar bad ka saiñ Hima Sima (diplomacy) ha kaba tang ka jingshlur ruh kam pat biang, hynrei donkam ruh ïaka jabieng kaba proh bad ïaka jingïohi jngai (vision). Ha kaba ïadei bad kane ym lah shisha ban len ba dei ma u, u ba long u nongsaiñdur ïa ka shlem kaba la wanrah shibun bah ki jingmyntoi ha bun ki liang ym tang hapoh ka Hima jong u, hynrei ha ka Ri bad jaitbynriew hi baroh kawei kumba ka long mynta. Ho’oid, watla kine ki ‘riewkhraw kila shim bad ïaid la la ka jong ka lynti hynrei ka jingthmu pat ka long kajuh kawei ka thong, kata, na ka bynta ka jingbha jingmiat jong ki khun ki hajar hapoh ka hima bad kumba long mynta haka Ri bad jaitbynriew hi baroh kawei. Hynrei kaba sngewsih pat ka long ba kat haduh kine ki sngi, kine artylli ki rukom pyrkhat kim pat ju ïakynduh bad ki dang ïeng nongshun kawei ïa kawei pat. U Tirot Sing u long ka dak jong ka jingshlur katba u Duwan Sing pat u long ka dak jong ka jingstad. Ka jingshlur bad ka jingstad kim dei ki artylli ki jingshisha hynrei ki dei tang ki bynta jong ka jingshisha kumba long ka dohnud bad ka jabieng kiba long tang ki bynta jong kawei ka dkhot met. Kine ki dei ban ïatreilang ryngkat ryngkat na ka bynta jong kawei ka thong. Hynrei ñiar pat ban shem ïa ki kumta, namar ba kine kim ju ïa sngewthuh jingmut pynban man ka por ka don ka thma bah bad ka jingïaleh pyrshah kaba jur hapdeng jong ki. Nangne mih artylli ki kynhun bad artylli ki pyrkhat ha kawei ka jaitbynriew. Kiwei ki jied ban ïaleh daka jingshlur bad kiwei pat da ka jingstad. Khyndiat eh kiba la leh ïa kaba dei ban leh, kham bun napdeng jong ki pat ki dei tang ki ‘riew arsap, ki don kiba pyndonkam bakla ïa ka jingstad jong ki tang kumno ban jop ïa ka jingsngew jong u babun balang, ki don pat kiba long tang kum ki myllung shempap kiba rwai shem mynsiem bad ka jingpyndonkam jong ki ïa ka kyrteng jong ka Ri bad ka jaitbynriew haduh ba la btiar hi laiñ ki shkor ban sngap. U paidbah u ba ju don bynta ha ki drama ha ki surok bah u dei u juh u paidbah u ba ju ïashim bynta haki tamasa election shisien san snem. Khatduh ngin shem ba ki ‘riewshlur bad ki Tirot Sing kiba mih shakhmat ban kit ban bah ïaka lyngkor jong ka Ri bad ka jaitbynriew ki dei pynban tang kito ki samla pule ba dang hapoh 30 snem kyrta ki bym pat lah tang ban kyrshan dalade ïalade, katba ki khraw pyrkhat ki Duwan Sing ki dei kito kiba la bit la biang ïalade ryngkat ka ïing hasem hynrei ki bym don pat ka mon ban kit ban tynrong lem ïa ka khia ka shon jong ka Ri bad jaitbynriew.

 

Authored by Shemphang Phanbuh & G.R. Syiemlieh

Tags: , , , ,

Leave a Reply